Stjarnan notaði ólöglegan leikmann

Nataly Sæunn Valencia kom inná í lið Stjörnunnar í leiknum …
Nataly Sæunn Valencia kom inná í lið Stjörnunnar í leiknum gegn Gróttu í gær en var ekki á leikskýrslu. mbl.is/Golli

Mótanefnd HSÍ barst formleg tilkynning frá handknattleiksdeild Gróttu í gær þar sem tilkynnt var að Stjarnan hafi notað ólöglegan leikmann í leik liðanna í úrslitakeppni Olís deildar kvenna sem fór fram þann sama dag. Þetta kemur fram á vef HSÍ.

Málsatvik voru þau að leikmaður Stjörnunnar nr. 17, Nataly Sæunn Valencia tók þátt í leiknum en leikmaðurinn var ekki skráður á leikskýrslu leiksins. Stjarnan hafði betur í leiknum, 25:22, en Grótta fagnaði sigri í fyrsta leiknum í Garðabæ þar sem úrslitin réðust í vítakeppni.

Niðurstaða mótanefndar er sú að Stjarnan hafi teflt fram ólöglegum leikmanni og úrskurðar þar með Gróttu sigur, 10:0, í leiknum. Grótta hefur þar með tvo vinningar í rimmu liðanna gegn engum Stjörnunnar. 

Í 7. grein reglugerðar HSÍ um handknattleiksmót segir: „Ekki er heimilt að breyta leikskýrslu eftir að leikur hefst né bæta leikmönnum eða starfsmönnum inn á hana en þó er heimilt að færa leikmann í starfsmann eða starfsmann í leikmann hafi tilskyldum fjölda ekki verið náð á öðrum hvorum staðnum áður en leikur hefst.“

Þá segir í 33. grein reglugerð HSÍ um handknattleiksmót:

"Félag sem notar leikmann/þjálfara í leikbanni eða leikmann/þjálfara sem er að öðru leyti ólöglegur og slíkt er tilkynnt inn til mótanefndar með formlegum hætti innan 48 tíma frá lokum leiks, telst hafa tapað leiknum með markatölunni 0-10 þar sem leiktími er 2 * 30 min. nema tap hafi verið stærra, þá skal sú markatala ráða. Þar sem leiktími er styttri skal notast við 0-5."

Staðfest er að tilkynning barst mótanefnd innan 48 tíma frá lokum leiks.

Leikmaður Stjörnunnar nr. 17 var ekki skráður á leikskýrslu við upphaf leiksins og hafði því ekki leikheimild í leiknum.

Niðurstaða mótanefndar er því sú að Stjarnan hafi notað ólöglegan leikmann í leik Gróttu og Stjörnunnar og telst því Stjarnan hafi tapað leiknum, 10:0.

Óskað var eftir áliti lögfræðings HSÍ og evrópska handknattleikssambandsins (EHF) og voru þau samhljóða áliti mótanefndar HSÍ, segir í frétt á vef HSÍ.

mbl.is
Fleira áhugavert
Fleira áhugavert