Selfoss tryggði sér í kvöld áframhaldandi veru í úrvalsdeild kvenna í handknattleik með stórsigri á KA/Þór á Selfossi, 38:23. Selfyssingar unnu þar með einvígi liðanna 3:0.
Staðan var 21:12 að fyrri hálfleiknum loknum og aldrei spurning hvoru megin sigurinn myndi lenda.
Perla Ruth Albertsdóttir átti góðan leik fyrir Selfoss og skoraði 11 mörk og næst kom Dijana Raojevic með 8 mörk.
Hjá KA/Þór var Ásdís Guðmundsdóttir markahæst með fimm mörk en Þóra Björk Stefánsdóttir skoraði fjögur.