Spakir hestamenn eftir leikinn

„Nei. Okkur skildist að allir hafi verið svo þreyttir eftir leikinn að þeir hafi farið beint að sofa,“ segir Pétur Björnsson lögreglumaður, spurður hvort lögreglan hafi sinnt eftirlitsstörfum á Landsmótinu í gærkvöldi eftir sigur íslenska karlalandsliðsins í knattspyrnu á Englendingum. Sýnt var frá leiknum í tveimur reiðhöllum á stórum skjám á mótssvæðinu og var stemmningin vægast sagt svakalega góð eins og alls staðar á landinu.

Löggæsla á Landsmótum er mikilvægur þáttur á jafnfjölmennu mannamóti og Landsmótið en búist er við að um tíu þúsund manns muni leggja leið sína í Hjaltadalinn. Pétur og Kjartan Jón Bjarnason lögreglumenn sinna löggæslu á mótinu ásamt fleirum. „Við erum að koma okkur upp aðstöðu, lögreglustöð eins og er í öðrum þéttbýliskjörnum. Við erum að sníða af agnúa eins og innakstur á svæðið svo þetta gangi allt smurt þegar allir eru komnir á svæðið,“ segir Pétur. Hann sinnti einnig löggæslu á síðasta Landsmóti sem haldið var í Skagafirðinum, nánar tiltekið á Vindheimamelum árið 2011. Honum líst vel á mótið, sérstaklega svæðið allt sem hann segir vera til fyrirmyndar. „Það eru allir svo ánægðir með svæðið að þetta verður bara gleði.“

Kjartan Jón tekur í sama streng en þetta er fyrsta sumarið hans í lögreglunni og líkar honum vel. „Þetta er víðfeðmara en ég hélt. Það er miklu meira sem þarf að hugsa út í og taka á en ég hafði gert mér grein fyrir,“ segir Kjartan Jón, spurður hvort það komi honum eitthvað á óvart í starfi lögreglumannsins.

• Blogga um frétt