Sextán dögum eftir að LeBron James tilkynnti að hann hefði ákveðið að snúa aftur til Cleveland Cavaliers eftir fjögurra ára dvöl hjá Miami Heat í NBA-deildinni í körfubolta, hefur bandaríska körfuboltastjarnan nú valið sér númer hjá Cleveland.
James valdi sér númerið 23 sem er sama númer og hann spilaði í hjá Cleveland á árunum 2003-2010. Þegar hann gekk í raðir Miami á sínum tíma valdi hann hins vegar að spila í treyju númer 6 eins, eins og hann hefur gert með bandaríska landsliðinu á Ólympíuleikum.
Margir Bandaríkjamenn höfðu beðið spenntir eftir því að LeBron James veldi sér númer, því nú munu Cleveland-treyjur seljast eins og heitar lummur. Talsmaður Adidas sagði við ESPN-fréttavefinn að 20 prentvélar væru nú á fullu að merkja Cleveland-treyjur með nafni LeBron James og númerinu 23, aðeins í Indianapolis, því búist er við mikilli treyjusölu strax á fyrstu klukkutímunum.