Darri Hilmarsson leikmaður KR var kampakátur eftir sigur KR-ingar í æsispennandi leik við Njarðvík í undanúrslitum Dominos deildar karla í körfuknattleik í DHL deildinni í kvöld. Lokatölur urðu 102:94 fyrir KR eftir tvíframlengdan leik.
„Þetta var rosalegur fyrir körfuboltann í heild sinni. Umgjörðin hér var mögnuð og gríðarlega gaman að sjá þann fjölda sem mætti á leikinn hér í kvöld. Þetta var svakalegur leikur milli tveggja góðra liða og sem betur fer endaði sigurinn okkar megin.“
KR-ingar hófu leikinn af gríðarlegum krafti og baráttan í liðinu var til fyrirmyndar sem skilaði sér svo í góðum sóknarleik.
„Það var rosalega mikil ákefð hjá okkur í upphafi leiksins. Við spiluðum ekki jafn ákafa vörn í öðrum leikhluta og skotin voru ekki að detta niður. Það kom þeim inn í leikinn og þar eftir var bara allt í járnum. Það var jafnt á öllum tölum eftir það og sem betur vorum við yfir þegar leiknum lauk.“
Darri Hilmarsson er feykilega góður varnarmaður og hefur dekkað marga góða körfuboltamenn í gegnum tíðina. Hann er á því að Stephen Bonneau sé sá besti sem hann hefur spilað á móti.
„Ég held að hann sé besti íþróttamaður sem að ég hef spilað á móti. Ég man ekki eftir svona snöggum leikmanni með svona mikinn sprengikraft. Hann er með fáránlega boltatækni og getur skotið á svakalegu tempói. Mér fannst ég gera allt sem í mínu valdi stóð til að verjast honum og hélt að það myndi duga. Hann fann samt alltaf leið að körfunni og er magnaður íþróttamaður.“
„Nú verðum við að koma okkur á jörðina fyrir fyrsta leik í úrslitaeinvíginu við Tindastól sem er eftir tvo daga. Við erum eðlilega glaðir eftir þennan leik hér í kvöld, en nú verðum við að fara að undirbúa okkur eins vel og hægt er fyrir leikinn á mánudaginn. Serían við Tindastól verður örugglega álíka rosaleg og þessi sem að við vorum í á móti Njarðvík. Vonandi náum við að klára hana líka.“