LeBron James og félagar í Cleveland Cavaliers tryggðu sér í kvöld sæti í undanúrslitum Austurdeildar NBA í körfubolta með því að vinna gamla stórveldið Boston Celtics, 101:93, í fjórða leik liðanna sem fram fór í Boston.
Cleveland vann þar með einvígið, 4:0, og því má segja að James hafi mætt með sópinn með sér til Boston og sent þar heimamenn í sumarfrí. James skoraði 27 stig og átti 8 stoðsendingar fyrir Cleveland, sem var komið með örugga forystu í hálfleik, 57:36. Boston náði að minnka muninn í sex stig, 99:93, á lokamínútunni en komst ekki nær.
Kyrie Irving skoraði 24 stig fyrir Cleveland sem missti Kevin Love af velli í fyrsta leikhluta vegna meiðsla í öxl. Þeir Isiah Thomas og Jared Sullinger skoruðu 21 stig hvor fyrir Boston.