Skagfirðingurinn Axel Kárason er, eftir því sem heimildamenn mbl.is halda fram, sá hraustasti í körfuboltalandsliðinu ef mið er tekið af þyngdum í kraftlyftingum. Axel gefur ekki mikið fyrir bekkpressuna en er mun hrifnari af réttstöðulyftunni.
Axel segir að fararstjórinn Páll Kolbeinsson geti dundað sér í bekkpressunni en með góðri ástundun í réttstöðulyftu verði menn „vinnusterkir“ sagði dýralæknirinn meðal annars og glotti.
Axel rataði í fréttirnar í morgun þegar greint var frá því hjá KKÍ á samskiptamiðlum að hann hefði samið ljóð í ferðinni um EM og þátttöku Íslands.
Mbl.is spurði Axel einnig út í skáldskapinn sem hann sagði vera fína leið til að dreifa huganum á hótelinu í aðdraganda landsleikja.