Körfuknattleiksmaðurinn Ægir Þór Steinarsson og félagar hans í spænska liðinu Huesca töpuðu í kvöld 1. leik liðsins í umspili um að komast í ACB-deildina, efstu deild spænska körfuboltans. Lokatölur urðu 78:76, San Pablo Burgos í vil.
Ægir lék 23 mínútur í kvöld og skoraði fjögur stig, átti sex stoðsendingar, stal boltanum tvisvar og tók eitt frákast. Leikið var á heimavelli San Pablo.
Slæmur 1. leikhluti Huesca varð liðinu á endanum að falli en sá tapaðist 27:18 og hélt lið San Pablo því forskoti inn í hálfleik. Huesca minnkaði muninn í 3. leikhluta í fjögur stig og svo aftur í tvö stig í lokaleikhlutanum en komst ekki lengra.
Bera þarf sigur úr býtum í þremur leikjum til þess að vinna einvígið, en staðan er nú 1:0, San Pablo í vil.