Hlynur Bæringsson, fyrirliði íslenska landsliðsins í körfuknattleik, mun leika með Stjörnunni í Dominos-deildinni í vetur. Hrafn Kristjánsson, þjálfari Stjörnunnar, staðfesti þetta við mbl.is.
Hlynur hefur náð munnlegu samkomulagi við Garðbæinga en mun skrifa undir samning við félagið seint í kvöld, að loknum leiknum gegn Sviss í Laugardalshöllinni.
Hlynur lék síðast hérlendis árið 2010. Vann hann þá tvöfalt með Snæfelli og var kjörinn leikmaður ársins af andstæðingum sínum.