„Það var ekki bara að við vildum, okkur beinlínis dauðlangaði í sigur, og við sýndum miklu meiri sigurvilja. Það er gríðarlega gott að byrja tímabilið á því að sækja sigur á heimavöll Tindastóls, þær gerast ekki mikið betri byrjanirnar en þetta, því að auðvitað vissum við vel að þetta yrði ekki auðvelt,“ sagði Sveinbjörn Claessen, leikmaður ÍR, eftir glæsilegan 74:71-sigur á Tindastóli á útivelli í Dominos-deild karla í körfubolta í kvöld.
Trausti Eiríksson, liðsfélagi hans, tók í sama streng. Tindastóll byrjaði mun betur, en með mögnuðum fjórða leikhluta tókst ÍR að komast yfir og tryggja sér sigur.
Þetta var auðvitað erfitt, við byrjuðum á því að grafa okkur allt of djúpa holu í byrjun, en það er fínn karakter í þessu liði og við vissum að við yrðum og við gætum komið til baka. Þó að við vissum líka að það yrði ekki auðvelt á sterkum heimavelli eins af bestu liðunum í deildinni. Við vorum fyrst allt of mikið að pæla í því hvernig þetta yrði, en svo létum við allar pælingar til hliðar og spiluðum eins og við gerum best og höfum gaman af því,“ sagði Trausti.