Gengur vel í Norðurá

Að sögn Einars Sigfússonar umsjónamanns með Norðurá í Borgarfirði þá gengur veiði orðið vel.

Sagði hann að síðast þegar hann fékk fréttir þá voru komnir 124 laxar á land sem væri mun betri veiði en á sama tíma í fyrra. Smálaxinn er farinn að sýna sig í bland við hefðbundinn stórlax sem virðist ætla að skila sér mjög vel þrátt fyrir að vera af kynslóð smálaxa sem brugðust algjörlega í fyrra. Rannsóknir á seiðabúskap í ánni í fyrra sýndi að seiðaþéttleiki var mikill og mikið magn af niðurgönguseiðum hafi haldið til hafs síðasta vor. Vonandi væri það ávísun á góðar göngur smálaxa nú í sumar en mesti óvissuþátturinn varðandi það væri þó alltaf afkoma seiðanna í hafinu.

Einar sagði að mikið vatn og snjóbráð hefði aðeins verið að þvælast aðeins fyrir veiðimönnum og enn sem komið er væri megnið af veiðinni fyrir neðan Laxfoss. Það væru samt komnir nokkrir fiskar á land af Réttarhylsbroti og Berghylsbrotinu sem eru veiðistaðir skammt fyrir neðan fossinn Glanna.

Einar er annar eiganda að Haffjarðará í Hnappadalssýslu og sagði að lokum að hún færi vel af stað þó hún væri vanalega seinni til en Norðurá. Hópur breskra veiðimanna hefði lokið þar veiðum í gær og allir farið afskaplega ánægðir heim. Byrjunin hafi verið góð en svo dofnaði yfir þessu í nokkra daga. Í gær og núna í morgun væri fiskur að sullast inn í miklu mæli. Hann hafi frétt það að veiðimenn hafi í gærkvöldi fengið fimm í beit á sama veiðistaðnum og misstu aðra fimm á öðrum veiðistað. Leiðsögumennn segja að sé af mikið fiski að koma inn.  Þá hefðu þeir að auki séð mjög stóran lax liggja efst í Sauðhyl sem þeir töldu að væri langt yfir 100 sentímetrar að lengd.

• Blogga um frétt

Seinustu hundraðkallar sumarsins