Ágæt opnun í Mývatnssveit

Árni Friðleifsson, formaður Stangaveiðifélags Reykjavíkur, var við veiðar í opnun á urriðasvæðinu í Laxá í Mývatnsveit á sunnudaginn og sagði hann aðspurður að veiðin færi þar vel af stað.

Árni kvaðst hafa náð að landa nokkrum urriðum allt upp í 63 sm langa og þegar hann fór eftir fjórar vaktir var hópurinn búinn að landa um 150 urriðum. Fram kom hjá Árna að hann hefði verið þarna í fyrsta skipti en menn með áratugareynslu hefðu verið þarna í hópnum og þeir sagt að um mjög hefðbundna opnun væri að ræða. Þeir hefðu haft orð á því að urriðinn væri vel haldinn og virtist koma vel undan vetri. Flest svæðin hafi gefið urriða sem voru um eða yfir 60 sm.

Ekki væri því að sjá að hinn mikli þörungavöxtur í Mývatni, sem margir hafi lýst miklum áhyggjum af, hefði enn sem komið er haft áhrif á urriðann í Laxá.

Skilyrði til veiða hefðu þó verið fremur erfið sem menn röktu til mikillar sólbráðar sem hefði verið í hitunum þessa daga og því hefði áin verið bólgin og fremur skolleit. Veiddist því óvenjumikið á straumflugur í þessari opnun og minna á púpur en oft áður.

Neðan úr Laxárdal voru ekki komnar nákvæmar fréttir en þó um 30 fiskar þar komnir á landi og aðeins aðeins fjórir fiskar af þeim undir fimm pundum.  Stærsti fiskurinn sem er kominn á land mældist úr dalnum er 74 sm, en þar eru að jafnaði færri en stærri urriðar en í Mývatnssveitinni.

• Blogga um frétt

Seinustu hundraðkallar sumarsins