Netaveiðin fer vel af stað í Þjórsá

Netaveiði hófst fyrir landi Urriðafoss í Þjórsá í gær og fer hún vel af stað.

Að sögn Einars H. Haraldssonar, bónda að Urriðafossi, þá lagði hann fyrstu netin í gærmorgun og hefur nokkrum sinnum vitjað um þau og ekki væri hægt að segja annað en að veiðin fari afskaplega vel af stað.

Mikill lax hafi komið strax í netin og sé það að mestu leyti óvenju vel haldinn stórlax.  Einn og einn smálax sé þó einnig innan um í aflanum.  Einar sagðist telja að þessi byrjun sé mjög svipuð því sem var árið 2010 sem hafi verið einstaklega gott veiðisumar í Þjórsá og því lofi þetta góðu.  Heimilt er að hafa netin niðri frá klukkan 10:00 á þriðjudagsmorgnum til klukkan 22:00 á föstudögum.

Einar sagði að miklu máli skipti þó varðandi framhaldið hvernig eins árs laxinn myndi skila sér úr hafi, en hann sagðist almennt bjartsýnn að eðlisfari og hefði einhverja tilfinningu fyrir því að smálaxinn myndi skila sér vel í ár. 

• Blogga um frétt

Seinustu hundraðkallar sumarsins