Frábær byrjun í Haffjarðará

Mikið rólegheitafólk opnaði Haffjarðará á þriðjudaginn og fer veiði mjög vel af stað.

Að sögn Einars Sigfússonar, eins af eigendum árinnar, sér eldra fólk um opnun árinnar að þessu sinni. Þau taka því mjög rólega og fóru nánast ekki út fyrsta daginn.  Á hádegi, eftir einn og hálfan dag, var búið að landa 40 löxum sem væri hreint afbragðsveiði, en aðeins er veitt á sex stangir.

Einar sagði að mest allt af þessum fiski væri stór og fallegur vorlax, en þó sæjust inn um smálaxar sem væri góðs viti og vekja vonir um góða smálaxagengd í sumar.

Einar heldur jafnframt utan um sölu á veiðileyfum í Norðurá og sagði að í gær hefðu verið komnir 220 laxar samtals á land sem væri glæsileg veiði. Á sama tíma í fyrra var búið að landa um 70 löxum.  Fiskur er búinn að dreifa sér vel um ána og samkvæmt teljara í laxastiganum í Glanna voru í morgun 114 fiskar gengnir þar upp, en einhver hluti þess gæti mögulega verið silungur.

Alltaf væri einhver hluti af laxinum sem færi þó upp fossinn sjálfan. Samkvæmt lengdarmælingu er sá stærsti sem gengið hefur í gegnum stigann 92 cm langur og gekk í gegn 8. júní.

• Blogga um frétt

Seinustu hundraðkallar sumarsins