Viðskipti | mbl | 29.12.2006 | 15:01

Útgáfufélögin Birtingur og Fögrudyr sameinuð

Hjálmur sem er að fullu í eigu Baugs á 60% í sameinuðu útgáfufélagi

Birtingur útgáfufélag ehf. hefur keypt Útgáfufélagið Fögrudyr ehf. og verður rekstur félaganna sameinaður nú um áramótin. Hlutafé Birtings hefur jafnframt verið hækkað og er nú 215 milljónir króna.

Í fréttatilkynningu frá Baugi kemur fram að félagið er skuldlaust með trausta eiginfjárstöðu. Er vonast til að velta félagsins á næsta ári geti orðið yfir einum milljarði króna.

Hið sameinaða félag er eigandi tímaritanna Ísafoldar, Vikunnar, Mannlífs, Gestgjafans, Nýs lífs, Séð og heyrt, Húsa- og híbýla, Veggfóðurs, Hér og nú, svo dæmi séu tekin.

Eigendur hins sameinaða félags eru Hjálmur ehf., sem er að öllu leyti í eigu Baugs Group hf. (60%), LL eignir ehf., sem er í eigu Sigurðar G. Guðjónssonar hrl. (28%), Elín Guðrún Ragnarsdóttir (10%), Reynir Traustason, Mikael Torfason og Jón Trausti Reynisson.

Stjórnarformaður Birtings ehf. er Sigurður G. Guðjónsson, en með honum í stjórn eru Sverrir Arngrímsson og Egill Þorvarðarson. Framkvæmdastjóri er Elín Guðrún Ragnarsdóttir.

Í tilkynningu kemur fram að uppi eru áform um útgáfu nýrra tímarita.