Löggjöf um sparisjóði endurskoðuð

Björgvin G. Sigurðsson, viðskiptaráðherra, segir að umræða undanfarinna missera um stöðu sparisjóðanna gefa til kynna að löggjöfin væri ekki að virka sem skyldi, en þar bæri hæst sjónarmið er snúa að hlutafjárvæðingu sparisjóðanna. Þetta kom fram í máli ráðherra á morgunverðarfundi Viðskiptaráðs Íslands, Samtaka fjármálafyrirtækja og viðskiptaráðuneytisins um stöðu sparisjóðanna. 

 Sagði Björgvin að í ljósi þessa hafi hann tekið ákvörðun um að skipa nefnd til að fara yfir 8. kafla laga um fjármálafyrirtæki, en sá kafli felur í sér tiltekin sérákvæði er snúa eingöngu að sparisjóðum en ekki öðrum fjármálafyrirtækjum.

 Ráðherra sagði að viðfangsefni nefndarinnar væri síður en svo einfalt enda þyrfti að sætta ólík sjónarmið, þ.e. sjónarmið viðskiptalífsins annars vegar og sjónarmið um samfélagslega ábyrgð hins vegar. Þannig þyrfti að finna farveg er myndi tryggja sparisjóðunum sem bestu samkeppnislegu stöðu en um leið varðveita samfélagslegt hlutverk þeirra.

Nánar er fjallað um fundinn á vef Viðskiptaráðs Íslands

• 1 blogg um fréttina

Bloggað um fréttina

• Benedikt Sigurðarson: Viðskiptaráðherra er á réttri leið . . .