Eins og í stríði
Verslun House of Fraser í Oxford Street. mbl.is/GSH
Á sama tíma og fjármálakreppan skellur með fullu afli á íslenska hagkerfinu reyna forystumenn í athafnalífi landsins að gera sem minnst úr tengslum sínum við Ísland. Á þennan veg hefst fréttaskýring stórblaðsins Financial Times um frostið á íslenska fjármálamarkaðinum.
Vitnað er til þeirra ummæla Jóns Ásgeirs Jóhannessonar, stjórnarformanns Baugs UK, að fyrirtækið standi traustum fótum, þar sem eignir félagsins, og stór hluti skulda, séu utan Íslands.
Talsmenn verslanakeðjanna House of Fraser og Mosaic Fashions minni viðskiptalífið á að Baugur sé ekki eini eigandinn og myndi því ekki taka þær niður með sér í fallinu.
Financial Times minnir ennfremur á að Baugur eigi einnig hluti í verslanakeðjunum Debenhams, Hamleys, Goldsmiths, Karen Millen og Coast. Eign íslenskra fyrirtækja takmarkist hins vegar ekki við þessi fyrirtæki og Kaupþing sagt hafa haft aðkomu að yfirtökutilboði í tískuverslanakeðjuna Matalan, ásamt því að hafa stutt við kaup Chris Ronnie, framkvæmdastjóra JJB Sports, í 15% hlut í keðjunni.
Þá hafi Exista keypt 14,9% hlut í JJB um líkt leyti, en þar fari stærsti hluthafinn í Kaupþingi. Að auki eigi aðrir íslensk fjármálafyrirtæki hluti í verslanakeðjum á borð við Hardy Amies.
Að samanlögðu séu því uppi flókin krosseignartengsl á íslenska fjármálamarkaðnum, sem aftur valdi því að erfitt sé að grennslast fyrir um hverjir eigi hvaða fyrirtæki.
„Þetta er eins og í stríði - óvarlegt tal getur kostað mannslíf,“ hefur blaðið eftir Don McCarthy, stjórnarformanni House of Fraser og fjárfesti í Baugi. „Ég er sannfærður um að hér stefni ekki í brunaútsölu. Við lítum ekki svo á að staða Baugs ógni fyrirtæki okkar,“ sagði McCarthy, sem flaug til Reykjavíkur fyrir helgi til að sitja stjórnarfund Baugs.
Þá er haft eftir Gunnar Sigurðssyni, forstjóra Baugs Group, að fyrirtæki félagsins í Bretlandi standi á traustum grunni. „Það sem hefur verið að gerast á Íslandi hefur engin áhrif á þau. Það er skýrt að við skuldum fé í íslenskum bönkum, en ef allt fer á versta veg, geta aðrir tekið yfir lánin,“ segir Gunnar um stöðu félagsins.
Oasis er hluti af Mosaic Fashions félaginu sem Baugur á ráðandi hlut í. mbl.is/Eggert
