Stjórnarlaun Exista lækkuð um 60%

Stjórn Exista lagði til á aðalfundi félagsins í morgun að laun stjórnarmanna verði lækkuð um ríflega 60% frá fyrra ári. Lögð var fram tillaga um að þóknun til stjórnarformanns fyrir næsta kjörtímabil verði 400 þúsund krónur á mánuði og 200 þúsund krónur á mánuði fyrir aðra stjórnarmenn. Jafnframt er lagt til að stjórnarmönnum verði fækkað.

Er lagt til að stjórn Exista verði skipuð þremur mönnum og einum til vara. Er þessi tillaga gerð í ljósi minnkandi umsvifa félagsins.

Stjórn hafði lagt fram tillögu um lækkun hlutafjár félagsins um rúma 13,9 milljarðar króna. En vegna þeirrar óvissu sem enn ríkir um uppgjör félagsins hefur stjórn ákveðið að draga þessa tillögu til baka. Þá var sömuleiðis dregin til baka breytingartillaga á samþykktum um að hlutafé félagins skuli vera 250 milljónir króna, að því er fram kom á aðalfundi félagsins sem nú stendur yfir.

• 1 blogg um fréttina

Bloggað um fréttina

• Andri Geir Arinbjarnarson: En hvað með heildarlaun stjórnarformanns?