„Alltof áhættusamt“ fyrir skattborgara

Guðlaugur Þór Þórðarson, þingmaður Sjálfstæðisflokksins, segir að tilskipun Evrópusambandsins um innistæðutryggingar í bönkum, sem til hefur staðið að innleiða í íslenska löggjöf, auki áhættu skattgreiðenda til muna.

Í umfjöllun um mál þetta í ViðskiptaMogganum í dag segir Steingrímur J. Sigfússon, þingmaður Vinstri grænna og fyrrverandi fjármálaráðherra, að fjölmargar spurningar vakni áður en það sé sjálfgefið hvort og hvernig Ísland innleiði þessa tilskipun.

Samkvæmt tilskipuninni munu sparifjáreigendur njóta verndar að lágmarki hundrað þúsund evra, sem jafngildir tæpum sextán milljónum króna, fari banki í gjaldþrot. Innistæðutryggingin nemur í dag um tuttugu þúsundum evra, sem jafngildir rúmum þremur milljónum króna, fyrir hvern innistæðueiganda í viðkomandi banka.