Tveimur framkvæmdastjórum hjá flugfélaginu WOW Air, þeim Tómasi Ingasyni og Arnari Má Arnþórssyni, var sagt upp störfum í gær. Svanhvít Friðriksdóttir, upplýsingafulltrúi félagsins, staðfestir þetta í samtali við vefinn Túristi.is.
Hún segir að þessar breytingar séu liður í því að að fylgja lággjaldastefnunni eftir enn frekar og standa við loforðið um að bjóða ávallt lægstu fargjöldin.
Tómas var forstöðumaður viðskiptaþróunarsviðs WOW Air og hóf störf í byrjun árs. Arnar Már tók við starfi framkvæmdastjóra sölu- og markaðssviðs í maí síðastliðnum. Í frétt Túrista segir að bæði Arnar og Tómas hafi langa reynslu frá Icelandair en hafi horfið til annarra starfa áður en þeir tóku við framkvæmdastjórastöðunum hjá WOW.