Verslanakeðjur vilja á Hörpureit

„Ýmsar keðjur sem við höfum sóst eftir vilja koma á fleiri en einn stað. Þær vilja vera í miðbænum og stórum verslunarmiðstöðum. Með þessu eru búnar til tvær einingar sem hægt er að bjóða þessum stóru keðjum,“ seg­ir Helgi S. Gunn­ars­son, for­stjóri Reg­ins, um væntanlega uppbyggingu félagsins á Hörpureitnum.

Í júlí undirrituðu Reginn hf. og Landstólpar þróunarfélag ehf. kaupsamning um kaup Regins á öllu versl­un­ar- og þjón­ustu­rými á reit­um eitt og tvö við Aust­ur­bakka 2, Hörpureitn­um svokallaða. Alls er um að ræða um átta þúsund fer­metra út­leigu­rými sem að megn­inu til er staðsett á 1. og 2. hæð bygg­ing­anna. 

Opnar vorið 2017

Verslunarmiðstöðin Smáralind er einnig í eigu Reg­ins og er áform­að að tengja starf­semi, rekst­ur og markaðsstarf Smáralind­ar við þenn­an nýja miðbæj­ar­kjarna í nánu sam­starfi við nú­ver­andi og nýja rekstr­araðila. Miklar breytingar verða einnig gerðar á Smáralind, en Helgi segir að þær verði kynntar nánar í nóvember. „Það liggur fyrir hvaða stefnu við tökum í þessu og nú vinnum við bara með ráðgjöfum að þeim skrefum sem við ætlum að taka,“ segir hann.

Áætlað er að verslunarrýmið á Hörpureitnum verði opnað vorið 2017. Helgi segir ýmsar keðjur hafa sýnt áhuga á rýminu en þó verður ekki gengið frá samningum strax. „Það er ekki skynsamlegt með svona löngum fyrirvara en við höfum verið í sambandi við ýmsa aðila og erum með ákveðnar hugmyndir,“ segir hann.

Helgi S. Gunnarsson, forstjóri Regins ehf. Eggert Jóhannesson

• Blogga um frétt