Í myndbandi sem tekið var úr dróna af framkvæmdum við Hótel Húsafell má sjá að um feiknarsmíð er að ræða. Allt er á áætlun þótt veðrið á næstu vikum sé ákveðið happdrætti. Stefnt er að opnun þann 17. júní á næsta ári. Þetta segir Bergþór Kristleifsson, framkvæmdastjóri Ferðaþjónustunnar í Húsafelli sem stendur að framkvæmdinni.
Hótelið er fellt inn í birkiskóginn í hjarta Húsafells, á milli þjónustumiðstöðvarinnar og sundlaugarinnar. Í miðjunni er tveggja hæða þjónustubygging sem grafin er niður í hraunið. Þar verður meðal annars 100 manna veitingastaður á efri hæð. Á þeirri neðri verður fjölnotasalur og aðstaða fyrir útivistarfólk, til dæmis þurrkaðstaða, geymslur fyrir gönguskó og annan búnað auk útgangs að sundlauginni. Út frá þessari miðju eru gistiálmur með alls 36 rúmgóðum gistiherbergjum en möguleiki er að bæta við svo þarna verði 50 herbergja hótel.
Um tuttugu manns starfa nú við uppbygginguna og segir Bergþór að um þriggja vikna steypuvinna sé eftir en vonir standa til um að byggingin verði fokheld fyrir jól.
Byrjað er að taka við bókunum og segir Bergþór þær fara ágætlega af stað en von er á fyrstu gestunum þann 15. júlí.
Myndbandið tók Alexander Eiríksson
Fyrri frétt: Hótel í hjarta Húsafells