Ninna Hafliðadóttir hefur verið ráðinn sem „Director of High End & Luxury Marketing“, nýstofnaðri einingu innan Meet in Reykjavík.
Markmiðið er að styrkja ímynd Reykjavíkur og Íslands í augum vel stæðra ferðamanna, markaðssetja áfangastaðinn og stuðla að langtímastefnumörkun á þessu sviði. Stofnaðilar verkefnisins eru Icelandair Group, Bláa Lónið, Landsbankinn og Meet in Reykjavík en gert er ráð fyrir fleiri þátttakendum á næstu mánuðum.
Ninna er með yfir 20 ára reynslu á sviði sölu og markaðsmála. Hún var framkvæmdarstjóri verslunarsviðs 66° Norður um árabil og sá þar um stefnumótun og tengingu við vel stæða ferðamenn í gegnum samstarfsaðila. Þá var hún verkefnastjóri í markaðsdeild Valentino í New York og sá um að halda utan um og skipuleggja allan stuðning vegna auglýsinga og útlána á fatnaði til leikara vegna verðlaunaathafna og viðtala. Hún starfaði einnig sem framkvæmdarstjóri verslunarsviðs J. Lindeberg í New York, sölustjóri Joseph í New York og Creative Director hjá Baby Guess í Los Angeles og var ábyrg fyrir opnun allra verslana þeirra í Bandaríkjunum.
Ninna er með BA gráðu í sölu og markaðsfræðum frá American College for the Applied Arts í Los Angeles.
„Það er mjög ánægjulegt að fá Ninnu um borð í þetta spennandi verkefni þar sem hún hefur fjölbreytta og alþjóðlega reynslu sem tengist lúxus markaðnum á margvíslegan hátt. En Ninna var valin úr hópi margra mjög hæfra umsækjenda,“ segir Þorsteinn Örn Guðmundsson Framkvæmdarstjóri Meet in Reykjavík.