Í Vesturvör í Kópavogi vinna 25 manns við hönnun, framleiðslu og sölu á dvergkafbátum eða svonefndum djúpförum. Byggist starfsemin á íslensku hugviti og tækniþekkingu. Hafa 50 djúpför verið smíðuð frá því fyrirtækið var stofnað fyrir nokkrum árum undir nafninu Hafmynd. Það heitir nú Teledyne Gavia og er í bandarískri eigu, en nánast öll starfsemin fer fram hér á landi.
„Sumir viðskiptavina okkar verða hissa þegar þeir uppgötva að þetta er framleitt á Íslandi,“ segir Arnar Steingrímsson sölustjóri. Djúpförin hafa þann kost að vera búin til úr einingum sem kaupandi getur sett saman að vild. Hægt er að setja í þau ný mælitæki eða nema þegar þau koma á markað. Einnig hvers kyns myndavélar.
Kaupendur dvergkafbátanna eru nær eingöngu erlendir aðilar. Þeir eru notaðir til varna og gæslu, björgunar, olíuleitar og hvers kyns rannsókna í hafinu á vegum háskóla, stofnana og fyrirtækja.