Leita eiganda hjólastóla og jóladóts

Samskip hafa stefnt manni sem átt hefur farm í geymslu hjá fyrirtækinu í tæp sjö ár. Þar á meðal eru tveir gamlir hjólastólar, flygill, jóladót og „risastór stóll“. Farmurinn var í 40 feta gámi sem kom til landsins í með Arnarfelli þann 22. apríl 2008.

Í farminum má þá einnig finna fjölda stóla, dúkkuhús, myndavélar, málverk, gamlar sagir og ballerínu.

Stefnan var birt í Lögbirtingarblaðinu í gær þar sem maðurinn finnst ekki. Hann er skráður til heimilis í London og hefur birting verið reynd á því heimilisfangi. Þá finnst ekki annað heimilisfang þrátt fyrir viðamikla leit lögmanns Samskipa á netinu að því er fram kemur í stefnunni.

Þess er krafist að maðurinn verði dæmdur til að greiða rúmar sex milljónir vegna geymslugjalds og kostnaðar vegna gámsins en auk þess er krafist staðfestingar með dómi á veðrétti og haldsrétti í farminum. Í stefnunni kemur jafnframt fram að að lögmaðurinn sé með aðra kröfu á hendur manninum í innheimtu.

Í Lögbirtingarblaðinu má sjá að þónokkur fyrirtæki eru með kröfu á hendur manninum í innheimtu, eitt vegna kaupa á lyftu og uppsetningu hennar og annað vegna trygginga en einnig hefur verið reynt að birta honum stefnu vegna ógreiddra húsfélagsgjalda, orkureikninga og fasteignagjalda.

• Blogga um frétt