Viðskipti | mbl | 29.1.2015 | 18:40

Inga í fyrstu Snapchat fréttinni

Inga Eiríksdóttir Skjáskot úr frétt Cosmo á Snapchat

„Viðskiptavinir hafa stundum viljað að ég væri stærri en við höfum alltaf fundið út úr því með púðum eða í eftirvinnslu,“ er haft eftir fyrirsætunni Ingu Eiríksdóttur, í fyrstu Snapchat frétt bandaríska tímaritsins Cosmopolitan.

Á þriðjudaginn kynnti samfélagsmiðillinn Snapchat umfangsmiklar breytingar á appinu þar sem fréttir frá völdum fjölmiðlum munu birtast í nýjum hluta miðilsins er nefnist „Discover“. Meðal fyrirtækja sem Snapchat samdi við eru CNN, Cosmopolitan, ESPN og National Geographic. Hægt verður að skoða fréttirnar í 24 klukkustundir eftir að þeim er hlaðið inn en þær hverfa að því loknu.

Breytir ekki líkama sínum

Í einni af fyrstu fréttum Cosmo er rætt við fyrirsætur sem teljast í yfirstærð eða svokölluð „Plus-size models“. Þeirra á meðal er Inga, sem er íslensk fyrirsæta, sem býr í New York. Hún segist hafa ákveðið að breyta aldrei líkama sínum fyrir viðskiptavini eftir að hafa glímt við það að þurfa sífellt að grennast þegar hún starfaði sem „hefðbundin“ fyrirsæta. Inga segist oft hafa fengið að heyra að hún væri ekki nógu þykk til þess að teljast í yfirstærð.

„Ég get skilið að konur í yfirstærð vilji sjá fyrirsætur sem endurspegla þeirra eigin stærð. Það fer eftir vörumerkinu sem um ræðir hvort betra sé að hafa þær stærri eða minni og það kemur fram í sölutölunum,“ segir Inga. „Ég er virkilega ánægð að sjá framgöngu þeirra sem eru „mitt á milli“ þar sem það eru svo margar frábærar fyrirsætur sem hvorki flokkast sem stærri eða minni,“ segir hún. Þá segist hún telja að í framtíðinni muni fyrirsætur af öllum stærðum og gerðum komast að, án þess að þær séu flokkaðar á einhvern hátt.

Helsta tekjulindin

Snapchat hefur unnið að „Discover“ hlutanum í nokkra mánuði og er honum ætlað að verða helsta tekjulind fyrirtækisins. Fyrirtækið er í dag metið á um tíu milljarða Bandaríkjadala en óljósara hefur verið um tekjuinnstreymi þess. Markvisst er nú greinilega unnið að breytingum þar á, þar sem auglýsingar tóku nýverið að birtast í appinu auk nýju uppfærslunnar.

Snapchat var stofnað í september 2011 af þremur nemendum í Stanford-háskóla í Kaliforníu, þeim Evan Spiegel, Reggie Brown og Bobby Murphy en með forritinu er hægt að taka myndir og myndskeið á farsíma og senda til vina sem aðeins eiga að geta séð þær í nokkrar sekúndur.

Forstjóri þess og einn stofnanda, hinn 24 ára gamli Evan Spiegel, er ekki gjarn á að gefa of miklar upplýsingar um fjárhag og rekstrarmódel Snapchat en þó hefur hann sagt stærstan hluta notenda vera á aldrinum 18 til 25 ára. Þá er ljóst að í síðastliðnum maí horfðu notendur á rúman einn milljarð af „sögum“ (e. My Story) og sendu um 700 milljónir mynda eða myndskeiða á milli á degi hverjum. Er þetta gífurlegur vöxtur ef horft er á tölur frá því í október í fyrra þegar um 350 milljónir mynda fóru daglega á milli.

Mbl.is: Milljarða virði en engar tekjur