Að meðaltali hefur verð á flugferðum frá Íslandi lækkað um 6,5% á milli mánaða en Helsinki sker sig úr með 46% verðhækkun á milli mánaða. Þetta er meðal þess sem kemur fram í samantekt Dohop um verð á flugi frá Íslandi næstu vikur og borið saman verð til áfangastaða þar sem samkeppni er á markaðnum.
Mesta hækkun á flugfaragjaldi milli mánaða er til Helsinki en hún er um 46%. Þegar litið er á mestu lækkun á milli mánaða þá er Dusseldorf þar með 29% lækkun. En í heild var um 6,5% lækkun á meðalverði milli mánaða.
Ódýrast að fljúga til Óslóar næstu vikur
Þegar horft er hvert ódýrast sé að fljúga næstu vikur kemur í ljós að Norwegian býður upp á ódýrasta flugmiðann eða að meðaltali 29.936 kr. til Óslóar. Icelandair býður upp á næst ódýrasta miðann að meðaltali 32.710 kr. Dýrasti flugmiðinn á listanum er til New York og er það flug með Icelandair sem kostar að meðaltali 92.172 kr. á þessum tíma.
Mestur verðmunur á einum áfangastað er á flugi til Helsinki þar sem tvö flugfélög eru með reglulegt áætlunarflug. Verð Finnair er 40,5% hærra en hjá keppinautnum Icelandair á þessari leið. Flugfélögin tvö eru einu flugfélögin sem fljúga beint til Helsinki.
WOWair nánast alltaf ódýrara en Icelandair
„Ef litið er á íslensku flugfélögin Icelandair og WOWair og bornar saman þær flugleiðir þar sem þau eru í samkeppni sjáum við að WOWair er með lægra fargjald á þeim öllum að undantekinni Kaupmannahöfn þar sem Icelandair er 10% ódýrara. Að meðaltali eru flugmiðar WOWair um 23% ódýrari en hjá Icelandair. Flugfélögin eru í samkeppni á eftirfarandi áfangastöðum: París, Boston, London, Amsterdam og Kaupmannahöfn,“ segir í tilkynningu frá Dohop.