Í dag lítur vefmiðillinn Rómur dagsins ljós. Markmiðið með stofnun hans er að skapa vettvang fyrir ungt frjálslynt fólk til að skipa sér stærri sess í samfélagsumræðunni. Miðillinn er fyrst og fremst hugsaður til pistlaskrifa en fastir höfundar við stofnun eru 35 talsins.
Í tilkynningu segir að stefna Róms sé að hafa fagmennsku að leiðarljósi og leggja frjálslynd gildi til umræðunnar í vel rökstuddum greinum. Miðillinn er rekinn sem frjáls félagasamtök, fjármögnuð einungis af stofnendum miðilsins og er ekki rekinn í hagnaðarskyni.
„Höfundarnir eru fjölbreyttur hópur einstaklinga sem eiga það þó allir sameiginlegt að aðhyllast frjálslyndi. Innbyrðis má finna afbrotafræðing, hagfræðing, hjúkrunarfræðinema, jarðfræðinema, stjórnmálafræðing, verkfræðing, læknanema, laganema, sálfræðinema, og framhaldsskólanema,“ segir í tilkynningu.
Stefnan er að vikulega birtist að lágmarki þrír pistlar Rómverja; Á mánudögum, miðvikudögum og föstudögum, auk ritstjórnargreinar á sunnudögum. Jafnframt á að gera listrænum gildum hátt undir höfði en reglulega munu birtast myndaseríur frá ljósmyndurum Róms.
Í fyrsta ritstjórnarpistli Róms segir: „Rómur er þannig hugsaður sem mótvægi við þeim jaðarskoðunum sem flesta dálka hafa fengið í dagblöðum landsins og flætt yfir bakka athugasemdakerfanna. Um leið er miðillinn tækifæri fyrir ungt fólk til þess að skipa sér sess og hefja upp raust sína.“