Væntanlegar breytingar á starfsumhverfi heilsugæslustöðva á höfuðborgarsvæðinu skapa forsendur fyrir miklu betri þjónustu og auka líkurnar á því að fjármagn fari í rétta hluti að sögn Birgis Jakobssonar, landlæknis.
Kristján Þór Júlíusson, heilbrigðisráðherra, kynnti breytingarnar í morgun en á fundinum voru einnig viðstödd landlæknir, Þórarinn Ingólfsson, formaður Félags íslenskra heimilislækna, Oddur Steinarsson, framkvæmdastjóri lækninga hjá heilsugæslu höfuðborgarsvæðisins, Hrafnhildur Halldórsdóttir, svæðisstjóri heilsugæslunnar í Mjódd, sem hefur verið með fyrstu stöðvum að fara í gegnum breytingarnar.
Líkt og mbl greindi frá í morgun snýr viðamesta breytingin að breyttri fjármögnun. Stefnt er að því að innleiða breytingarnar á miðju ári og verður fjármögnun heilsugæslustöðvanna þá skipt í tvennt þar sem annars vegar verður um að ræða níutíu prósent fasta fjármögnun og hins vegar tíu prósent breytilega fjármögnun sem ræðst m.a. af gæðum þjónustunnar.
Frétt mbl.is : Heilsugæsla fjármögnuð eftir gæðum
Þá er stefnt að því að opna þrjár nýjar heilsugæslustöðvar sem annað hvort verða á hendi opinberrar stofnunar eða félags sem stofnað verður um rekstur viðkomandi stöðvar. Ítarleg kröfulýsing hefur þegar verið búin til og munu Sjúkratryggingar Íslands auglýsa eftir rekstraraðilum. Ekki er um eiginlegt útboð að ræða þar sem niðurstöðurnar eiga ekki að ráðast af verði heldur gæðum.
Stefnt er að því að heilsugæslurnar nýju hefji starfsemi í haust en ekki er gert ráð fyrir auknu fjármagni fyrir rekstri þeirra heldur eiga þær að fjármagna sig sjálfar út árið.
Í stuttu máli gengur þessi breytta fjármögnun út á það að fjármagn til hverrar stöðvar á að endurspegla þann sjúklingahóp sem viðkomandi stöð þjónar. Fólki verður frjálst að skrá sig á hvaða heilsugæslu sem það vill og er markmiðið að skapa samkeppni á milli stöðva og auka val sjúklinga.
„Ég var úti í Stokkhólmi í síðustu viku og spjallaði þar við lækna og spurði þá hvað þyrfti að koma til þess að þeir myndu hafa áhuga á að koma inn í íslenskt heilbrigðiskerfi,“ sagði Birgir Jakobsson, landlæknir, á fundinum. „Það voru nánast allir sammála um það að laun lækna á Íslandi í dag væru samkeppnishæf við laun lækna í Svíþjóð. Það var ekki aðalatriðið. Það sem þeir settu á oddinn voru starfsskilyrðin sem okkur eru búin á Íslandi“ sagði Birgir og bætti við að verið væri að kynna stórt skref fram á við að hans mati.
Þórarinn Ingólfsson, formaður Félags íslenskra heimilislækna, benti á að fyrirliggjandi kröfulýsing væri mjög nákvæm og setti miklar kröfur á gæði og öryggi sjúklinga með góðu aðgengi. Kristján Þór tók undir þetta og sagði stífar kröfur vera gerðar um gæði.
Líkt og áður segir mun breytilegi hluti fjármögnunarinnar ráðast af þáttum sem snúa að gæðum veittrar þjónustu og félagslegum þáttum að hluta. Þar verður m.a. horft til framkvæmdar á skráningu heilbrigðisupplýsinga, reglubundinnar skoðunar og endurmats á lyfjanotkun aldraðra og að hve miklu leyti fólk heldur tryggð við heilsugæslustöðina þar sem það er skráð.
Oddur Steinarsson, framkvæmdastjóri lækninga, sagði að stíga þyrfti varlega til jarðar í þessum efnum og horfa til þessara fyrrgreindra öruggra gæðavísa. Kristján sagði hugmyndir um að auka vægi fjármögnunar eftir gæðum ekki vera á borðinu.
Þórarinn hefur ekki gert formlega viðhorfskönnun meðal félagsmanna vegna breytinganna en sagðist þó hafa þreifað fyrir sér og telur jákvæðan tón vera í fólki. Þó kannski meira meðal yngri lækna en eldri lækna. Allir læknar væru þó almennt til að að setja allan sinn metnað í að bæta gæði veittrar þjónustu.
Þórarinn sagðist þó ekki skilja skilyrðið um að óheimilt verði að taka arð út úr rekstri heilsugæslustöðvana og sagði óljóst hvers vegna þessir rekstraraðilar þurfi að vinna við önnur skilyrði en aðrir og bætti við að slíkar hömlur væru almennt ekki að finna á hinum Norðurlöndunum.
Hrafnhildur Halldórsdóttir, svæðisstjóri heilsugæslunnar í Mjódd, sem hefur verið með fyrstu stöðvum að fara í gegnum breytingarnar sagði þær mjög jákvæðar og hvetja til aukinnar samvinnu.
Hún sagði starfsmenn vera farna að skipta sér upp í teymi og hugsa sem eina liðsheild í stað þess að einblína á einstaklingsvinnu. „Framtíðarsýn okkar er að geta tekið á smáslysum og létt á bráðamóttökunni en það er staðreynd að þeir eru að fá talsvert magn af sjúklingum sem eiga að koma til okkar,“ sagði Hrafnhildur.
BSRB hefur mótmælt breytingunum en í yfirlýsingu frá samtökunum segir eðlilegt sé að nýjar heilsugæslustöðvar verði fjármagnaðar af almannafé eins og þær sem fyrir eru, og starfi samkvæmt sama fyrirkomulagi. Líkt og áður segir verða nýju heilsugæslunnar annað hvort á hendi opinberrar stofnunar eða félags sem stofnað verður um rekstur viðkomandi stöðvar.