Icelandair flutti 221 þúsund farþega í millilandaflugi í mars og voru þeir 21% fleiri en á síðasta ári. Framboðsaukning á milli ára nam 20%. Sætanýting var 84% og jókst um 1,4 prósentustig á milli ára og hefur aldrei verið hærri í mars.
Farþegar í innanlandsflugi og Grænlandsflugi voru um 24 þúsund í mars og fjölgaði um 2% á milli ára.
Framboð félagsins var aukið um 1% samanborið við mars 2015. Sætanýting nam 73,0% og lækkaði um 0,3 prósentustig á milli ára.
Seldir blokktímar í leiguflugi jukust þá um 8% á milli ára. Fraktflutningar jukust um 1% frá því á síðasta ári.
Seldum gistinóttum á hótelum félagsins fjölgaði um 9% miðað við mars á síðasta ári. Herbergjanýting var 81,2% samanborið við 78,8% í fyrra.