Festi ehf., sem er móðurfélag Krónunnar, Elko, Krónunnar, Kjarvals og Intersport, seldi vörur fyrir 35,7 milljarða króna á síðasta ári og er það 7,3% aukning milli ára. Hagnaður jókst um 47% og nam tæplega 1,5 milljörðum króna samanborið við rúman milljarð á síðasta ári.
EBITDA félagsins (án einskiptis hagnaðar af sölu fasteignar) nam 3,26 milljörðum sem er bati um 27%. Heildareignir félagsins eru 35,2 milljarðar og eigið fé Festi er 11,3 milljarðar eða 32,2%. Arðsemi eigin fjár er 15%.
Festi ehf. á einnig Festi Fasteignir sem rekur um 80.000 fermetra af fasteignum. Útleiguhlutfall er 97,8%.
Félagið hóf starfsemi sína í mars 2014 og hefur á þeim tíma unnið í verulegum breytingum á starfsemi félagins. Hefur fjórum Nóatúnsverslunum verið breytt í Krónu og í tilkynningu segir að verð á yfir 1.000 vörum hafi verið lækkað í öllum Kjarvalsverslunum á landsbyggðinni. Þá hafi verð á raftækjum lækkað um rúm 17% í kjölfar tollabreytinga og áherslubreytinga Elko.
Hluthafar í Festi eru um þrjátíu talsins, bæði einkafjárfestar, fjárfestingasjóðir, fyrirtæki og lífeyrissjóðir. Stjórnarformaður Festi er Hreggviður Jónsson og forstjóri félagsins er Jón Björnsson.