Endursölumarkaðurinn heftir vöxt hjá bílaleigum

„Þegar mest er leggjum við upp undir 20% af bílaflotanum okkar, þó að sú tala fari minnkandi vegna aukinnar eftirspurnar yfir vetrarmánuðina,“ segir Steingrímur Birgisson, forstjóri Bílaleigu Akureyrar í Morgunblaðinu í dag.

Bílaleigubílar í landinu eru orðnir svo margir að hætta er á að endursölumarkaðurinn taki illa við þeim fjölda bíla sem bílaleigur þurfa að losa vegna endurnýjunar. Steingrímur segir að Bílaleiga Akureyrar hafi selt hátt í 1.300 bíla á síðasta ári og ekki sé ólíklegt að samtals hafi allar bílaleigur landsins selt einhvers staðar í kringum 5.000 bíla. Hann býst þó ekki við því að fjöldinn sem komi inn á markaðinn í ár valdi einhverjum vandræðum.

„Ég held að við séum ekki að horfa á neinar ofboðslega háar tölur bíla sem koma inn á markaðinn núna, heldur væri það frekar í lok næsta sumars sem við munum sjá töluvert fleiri bílaleigubíla á endursölumarkaðnum. Til lengri tíma verður þetta vandamál og mun hefta vöxt bílaleiga, enda liggur það ljóst fyrir að við getum ekki fjölgað bílum mikið meira en markaðurinn er tilbúinn að taka við í endursölu þegar kemur að endurnýjun.“