Það er mat Samkeppniseftirlitsins að samruni Eikar fasteignafélags og Slippsins fasteignafélags hindri ekki virka samkeppni og leiði ekki til myndunar markaðsráðandi stöðu. Þá telur eftirlitið að samruninn leiði ekki til þess að samkeppni á markaði raskist að öðru leyti með umtalsverðum hætti.
Sagt var frá kaupum Eikar á Slippnum í byrjun janúar. Á vef Samkeppniseftirlitsins kemur fram að um sé að ræða láréttan samruna á markaði fyrir leigu á atvinnuhúsnæði á höfuðborgarsvæðinu.
„Eik fasteignafélag er þriðja stærsta leigufélag landsins og með þessum samruna stækkar eignasafn fyrirtækisins óverulega,“ segir í úrskurðinum.
Tilboð Eikar um kaup á öllu útgefnu hlutafé Slippsins fasteignafélags var undirritað 18. nóvember. Í tilkynningu kom fram að heildarvirði kaupanna væri 4.450 milljónir króna. Fasteignir í eigu Slippsins fasteignafélags voru Mýrargata 2-8, Mýrargata 12 og Mýrargata 14-16, sem hýsa Icelandair Hótel Reykjavík Marina.
Eignirnar eru samtals 6.504 fermetrar og Flugleiðahótel er leigutaki allra fermetranna og eru með langtímaleigusamning.