Hafrún Friðriksdóttir hefur verið skipuð í framkvæmdastjórn Teva, sem er stærsti samheitalyfjaframleiðandi heims. Hafrún er yfir þróun og skráningu samheitalyfja hjá Teva en um 3.000 manns starfa undir henni. Hún gekk til liðs við Teva á síðasta ári við yfirtöku fyrirtækisins á Actavis.
12 manns sitja í stjórn Teva og er Hafrún önnur konan til þess að sitja í stjórninni frá stofnun fyrirtækisins 1901.
Hafrún starfar hjá Teva í New Jersey í Bandaríkjunum og hefur hún verið búsett þar frá árinu 2008. Hún sér ekki fram á að flytja til Ísraels, þar sem höfuðstöðvar Teva eru, vegna stöðunnar í framkvæmdastjórninni en býst við því að fara þangað að minnsta kosti einu sinni í mánuði.
Eins og fyrr segir er Teva stærsti samheitalyfjaframleiðandi heims og er starfsemin gríðarstór. Um 50.000 manns starfa hjá fyrirtækinu um allan heim og gert er ráð fyrir því að sala Teva á samheitalyfjum og frumlyfjum á þessu ári nemi 23 milljörðum Bandaríkjadala á heimsvísu.
Hafrún hefur starfað við þróun samheitalyfja í tuttugu ár. Hún lauk námi í lyfjafræði við Háskóla Íslands árið 1987. Eftir það starfaði hún hjá sænska lyfjafyrirtækinu Pharmacia og bjó hún í Svíþjóð í tvö ár ásamt fjölskyldu sinni. Síðan fór hún heim til Íslands og hóf doktorsnám í eðlislyfjafræði við Háskóla Íslands árið 1992 og var þar við stundakennslu og rannsóknir í fimm ár. Eftir að hafa varið doktorsritgerð sína árið 1997 fór hún að vinna hjá lyfjafyrirtækinu Omega Pharma sem þróunarstjóri en fyrirtækið var keypt af Actavis árið 2002. Hún var nú síðast yfir þróunarsviði Actavis í Evrópu og í Ameríku áður en hún hóf störf hjá Teva á síðasta ári eins og fyrr segir.
Eins og kemur fram hér að framan starfa um 3.000 manns á sviðinu sem Hafrún stýrir. Þrjú þróunarsetur eru í Bandaríkjunum, eitt í Ísrael, sem er stærsta þróunarsetrið. Til viðbótar eru þróunarsetur í Ungverjalandi, Rúmeníu, Króatíu, Bretlandi, Írlandi, Indlandi, Síle, Argentínu, Japan og á Íslandi. Til viðbótar við þróunarsetur, þá heyra fimm klínískar rannsóknarstöðvar á Indlandi og í Bandaríkjunum undir svið Hafrúnar. Þá tilheyrir skráningarsviðið einnig þróunarsviðinu, en það sér um skráningar samheitalyfja á öllum mörkuðum á heimsvísu.
Tilkynnt var um að Hafrún myndi taka sæti í framkvæmdastjórninni fyrir viku síðan. „Við kaup Teva á Actavis urðu breytingar á uppbyggingu og framkvæmdarstjórn fyrirtækisins, sem leiddi til þess að mér var boðin staða í framkvæmdastjórn Teva,“ segir Hafrún aðspurð hvort að skipunin hafi komið henni á óvart og hvort að einhver aðdragandi hafi verið að þessum breytingum. „Ég er náttúrulega ekki búin að vera lengi hjá Teva en mjög lengi í þessum bransa.“
Hafrún útskýrir fyrir blaðamanni að ekkert fyrirtæki í samheitalyfjageiranum komist nálægt því sem Teva er í dag. Til að mynda sendi Teva inn 61 nýtt samheitalyf til skráningar í Bandaríkjunum á síðasta ári og aðspurð hvort að það sé mikið segir Hafrún að næsta fyrirtæki á eftir Teva hafi mögulega sent inn 20 - 30 umsóknir til skráningar i Bandaríkjunum.
„Bandaríski samheitalyfjaiðnaðurinn gengur mikið út á það að vera fyrstur til að senda inn og skrá samheitalyf. Síðasta ár vorum við staðfest með 28 „first to file“ eins og það er kallað. Venjulega fær það fyrirtæki sem er fyrst til að senda inn samheitalyf til skráningar i Bandaríkjunum, sex mánaða tímabil þar sem það er eina samheitalyfið á markaði. Það fyrirtæki sem var með næst flest svo kallað „first to file“ var með 5-6 umsóknir á samheitalyfjum. Þannig að þetta er ansi breytt bil“ segir Hafrún.
Teva skráir ekki einungis lyf á Bandaríkjamarkaði heldur segir Hafrún Evrópu og markaði utan Evrópu og Bandaríkjanna einnig mjög mikilvæga fyrir fyrirtækið. „Árið 2016 sendum við inn hundruð umsókna til skráningar á lyfjum um allan heim til þess að styðja við framtíðarvöxt Teva,“ segir Hafrún.
„Eftir kaupin á Actavis hefur verið unnið markvisst að endurskipulagningu fyrirtækisins. Teva er framsækið og spennandi fyrirtæki, auðvitað erum við að takast á við vandamál líkt og fleiri lyfjafyrirtæki í heiminum í dag en framtíðin er björt og ég hlakka til að takast á við ný verkefni í framkvæmdastjórninni,“ segir Hafrún.