Reginn semur um kaup á 2.700 fermetra reit við Austurhöfn

Reginn hf. hefur skrifað undir samkomulag um einkaviðræður við fyrirtækið Austurhöfn ehf. um kaup félagsins á öllu atvinnuhúsnæði á reit 5b á lóðinni Austurbakka 2 í miðborg Reykjavíkur. Um er að ræða 2.700 m2 verslunar- og veitingarými á horni Geirsgötu og Austurhafnar. Byggingarnar sem munu hýsa áðurnefnd verslana- og veitingarými eru afmarkaðar af Gömlu höfninni, Marriott EDITION, fimm stjörnu hóteli sem er nú í byggingu, fyrirhuguðum höfuðstöðvum Landsbankans og Hafnartorgi. Rýmið tengist bílakjallara sem nær frá Hörpu niður á Lækjatorg.

Þetta kemur fram í tilkynningu Regins til Kauphallarinnar.

Um er að ræða verslunar- og veitingarými að langmestu á jarðhæð, en að litlum hluta í kjallara og 2. hæð. „Kaupin ef af verða falla vel að fjárfestingastefnu félagsins sem felur í sér að auka hlut félagsins m.a. í hágæða atvinnuhúsnæði á sterkum markaðssvæðum,“ segir í tilkynningunni en miðað er við að rýmin verði afhent tilbúin til útleigu um mitt ár 2019.

„Tilgangur viðskiptanna ef af verður, er að styrkja viðskiptahugmyndir Regins á svæðinu enn frekar. Félagið hefur lagt áherslu á mikilvægi þess að verslana- og þjónusturými á þessu einstaka svæði í miðbæ Reykjavíkur verði hugsuð, skipulögð og rekin sem ein heild. Með því næst betur að tryggja rétta samsetningu og gæði þeirra eininga sem saman mynda fyrirhugaðan verslana- og þjónustukjarna,“ segir í tilkynningunni en fyrir er Reginn kaupandi af öllu verslana- og veitingarými á Hafnartorgi sem er staðsett á reitum 1 og 2 á lóðinni Austurbakka 2.

Þá segir jafnframt að umfang viðskiptanna hvað varðar fjárhag og stærð, er lítið í samanburði við eignasafn Regins og muni hafa óveruleg áhrif á fjárhag og afkomu félagsins. Samkomulagið er þó með ýmsum fyrirvörum m.a. um áreiðanleikakannanir og samþykki stjórnar Regins.

• Blogga um frétt