Bankaupplýsingum um 400 þúsund viðskiptavini hjá ítalska bankanum Unicredit hefur verið stolið eftir tvær tölvuárásir. Unicredit fullyrðir að lykilorð notenda að netbankanum séu ekki í þýfinu.
Fréttavefur breska ríkisútvarpsins greinir frá stuldinum sem er sá stærsti í sögu bankageirans á Ítalíu. Fyrsta árásin átti sér stað haustið 2016 en sú síðari nú í sumar.
Upplýsingarnar sem um ræðir eru aðallega persónuupplýsingar og bankanúmer og segir Unicredit að tölvuþrjótarnir hafi ekki getað framkvæmt millifærslur í óleyfi.
Aðrir ítalskir bankar taka fyrir að hafa orðið fyrir samskonar tölvuárásum en verð hlutabréfa í Unicredit féll um 1% í kjölfar tilkynningarinnar.
Stefnt er að innleiðingu Evrópureglugerða á næsta ári sem kveða á um sektir upp að 4% af ársveltu ef bankar tilkynna ekki að hafa orðið fyrir öryggisrofi innan nokkurra klukkutíma.