Dómkvaddir matsmenn sem fengnir voru í fyrra til að meta verðmæti stofnfjár í Sparisjóði Vestmannaeyja hafa ekki fengið fullnægjandi aðgang að gögnum til verðmatsins. Bankinn ber fyrir sig bankaleynd.
Matsbeiðendur gerðu í kjölfarið tillögu að sátt um lágmarksaðgang að gögnum án persónugreiningar, en þeirri sátt var hafnað af Landsbankanum og þess í stað boðinn fram mjög takmarkaður aðgangur, að því er fram kemur í umfjöllun um mál þetta í ViðskiptaMogganum í dag.
Vestmannaeyjabær og Vinnslustöðin hafa nú sent formanni bankaráðs Landsbankans bréf þar sem kallað er eftir afstöðu bankaráðsins til aðgangs matsmannanna. Bankaráðið mun taka bréfið fyrir á fundi nú í sumar, samkvæmt skriflegu svari bankans.