Engin ákvörðun er varðar útboð á hlutafé í Arion banka verður tekin þangað til að alþingiskosningar eru afstaðnar. Þetta kemur fram í tilkynningu frá Kaupþingi.
Paul Copley, forstjóri Kaupþings, segir að undirbúningur vegna sölu á hlut Kaupþings í Arion banka sé í gangi og að einn af valkostunum sé útboð.
„Vegna þess að boðað hefur verið til alþingiskosninga munum við ekki taka ákvörðun um hvort ráðist verði í hlutafjárútboð fyrr en ný ríkisstjórn hefur verið mynduð,“ segir Copley. „Það þýðir að mjög ólíklegt sé, en ekki ómögulegt, að ákvörðun verði tekin þannig að útboðið geti átt sér stað á þessu ári.“
Greint hefur verið frá því að til skoðunar sé í tengslum við frekari sölu á hlutum Kaupþings í Arion banka að halda almennt hlutafjárútboð og skrá hlutabréfin í kauphöll hér á landi.