Fjármálaeftirlitið hefur komist að þeirri niðurstöðu í athugun á innheimtuferli við frum- og milliinnheimtu hjá Arion banka, Íslandsbanka og Landsbankanum að bankarnir starfi almennt í samræmi við góða innheimtuhætti. Verkferlar voru skýrir og fjárhæðir innheimtukostnaðar í samræmi við reglugerð um hámarksfjárhæð innheimtukostnaðar samkvæmt lögum.
FME hóf athugun á innheimtuferli við frum- og milliinnheimtu hjá bönkunum í janúar en markmið athugunarinnar var að skoða hvort innheimta bankanna væri í samræmi við góða innheimtuhætti samkvæmt innheimtulögum og reglugerð um hámarksfjárhæð innheimtukostnaðar. Athugunin beindist að fimm innheimtumálum sem stofnuð voru í byrjun hvers ársfjórðungs, þ.e. í janúar, apríl, júlí og október á síðasta ári, hjá hverjum banka fyrir sig. Verkferlar bankanna voru skoðaðir, ásamt gjaldskrám þeirra en niðurstöður lágu fyrir í júlí
Þrátt fyrir að verkferlar og fjárhæðir innheimtukostnaðar væru almennt í samræmi við góða innheimtuhætti gerði FME athugasemd við að innheimtukostnaður í milliinnheimtubréfi vegna skuldar á veltukorti hjá Íslandsbanka tók í senn mið af fjárhæð gjaldfallinnar kröfu og eldri gjaldfallinnar kröfu sem er í andstöðu við ákvæði um hámarksfjárhæð innheimtukostnaðar samkvæmt innheimtulögum. FME fór fram á að Íslandsbanki gerði úrbætur vegna athugasemdarinnar fyrir 1. október og sendi eftirlitinu staðfestingu þess efnis.