Lýstar kröfur í þrotabú Lífs og heilsu ehf. námu samtals um 129 milljónum króna, en um 60 milljónir fengust upp í kröfurnar. Nam þrotið því um 70 milljónum króna, en félagið rak áður skyndibitastaðinn Metró. Félagið var tekið til gjaldþrotaskipta í janúar 2013, en árið 2015 var eigandi staðarins dæmdur í árs fangelsi fyrir skattsvik sem tengdust staðnum.
Samkvæmt auglýsingu í Lögbirtingablaðinu voru forgangskröfur rúmlega 18 milljónir, almennar kröfur tæplega 111 milljónir og eftirstæðar kröfur upp á 426 þúsund.
Forgangskröfur fengust að fullu greiddar sem og tæplega 42 milljónir upp í almennar kröfur, eða 37,72%. Ekkert fékkst greitt upp í eftirstæðar kröfur.
Skiptalokum á þrotabúi eiganda staðarins, Jóns Garðars Ögmundssonar, var lokið í byrjun síðasta árs, en ekkert fékkst greitt upp í 166 milljóna króna kröfur. Hann hafði sem fyrr segir áður verið dæmdur í fangelsi vegna skattsvika. Annars vegar var um að ræða skattsvik á árunum 2009 og 2010 og hins vegar vegna áranna 2011 og 2012. Í síðara skiptið tengdust brotin Lífi og heilsu.
Bæði brotin tengdust því að hann hafði ekki staðið skil á greiðslu opinberra gjalda sem hann hafði haldið eftir af launum starfsmanna.
Áður rak Jón Garðar McDonalds á Íslandi í gegnum einkahlutafélagið Lyst ehf., en eftir hrun fjármálakerfisins breytti hann rekstrinum. Gjaldþrotaskiptum á félaginu var lokið í mars 2013, en gjaldþrotið nam 370 milljónum. Fyrra brotið tengdist þessu félagi.