Krónprinsinn í Sádi-Arabíu, Mohammed bin Salman, er eigandi dýrustu fasteignar heims samkvæmt frétt New York Times. Um er að ræða franskan kastala en ráðgáta hefur ríkt um hver keypti kastalann árið 2015 á 300 milljónir bandaríkjadala, 31,8 milljarða króna.
Kastalinn, Chateau Louis XIV, var keyptur í gegnum fjölmörg skúffufyrirtæki og fjárfestingarfélög í Lúxemborg og víðar en prinsinn kemur víða við í fjárfestingum sínum á sama tíma og hann segist berjast gegn spillingu í heimalandinu.
Þegar kastalinn var seldur fyrir tveimur árum sagði Fortune tímaritið hann vera dýrasta heimili heims og voru birtar myndir í tímaritum af gullslegnum gosbrunnum, marmarastyttum og völundarhúsi á lóð kastalans. En hvergi kom fram hver kaupandinn var fyrr en New York Times greindi frá því um helgina.
Sádi-Arabískir prinsar hafa verið frekir til fjárins að undanförnu en meðal annars hafa borist fregnir af kaupum á snekkju á 500 milljónir bandaríkjadala og að sjálfsögðu málverkið eftir Leonardo da Vinci á 450 milljónir dala.
Kastalinn er ekki langt frá Versölum, vestur af höfuðborginni, París. NYT hefur nú fengið það staðfest af ráðgjöfum konungsfjölskyldunnar í Sádi-Arabíu að prinsinn hafi keypt kastalann. Rannsóknarblaðavefurinn Mediapart komst að sömu niðurstöðu og NYT í júlí án þess að fá það staðfest að prinsinn ætti kastalann.
Ýmislegt er hægt að gera sér til dundurs í kastalanum til að mynda er hægt að stjórna gosbrunnunum með iPhone, skreppa í bíó eða fá sér sundsprett í sundlaugum á landareigninni.
Við fyrstu sýn virðist kastalinn vera kominn til ára sinna en raunin er önnur. Því eigendurnir rifu gamla kastalann til grunna og byggðu nýtt hús.