Í Rangárþingi ytra er að finna fallega hannaðan sumarbústað. Þó hönnun hússins að innan og utan gleðji sannarlega augað er það þó stór náttúrulaug við húsið sem setur punktinn yfir i-ið.
Húsið er á tveimur hæðum en eigendurnir hafa sett neðri hæðina á leigu á bókunarvef Airbnb. Þar kemur fram að húsið sé á hestabúgarðinum Sumarliðabæ, en gestir fá aðgengi að náttúrulauginni ásamt snyrtilegri aðstöðu til fataskipta og glæsilegri saunu.
Sumarbústaðurinn hefur verið innréttaður á nútímalegan og stílhreinan máta þar sem náttúruleg litapalletta ræður för. Í eldhúsinu er falleg ljósgrá innrétting með viðarborðplötu, en í stað efri skápa hefur langri hillu verið komið fyrir sem skapar léttari stemningu í rýminu.
Gólfsíðir gluggar prýða alrýmið sem samanstendur af eldhúsi, stofu og borðstofu, en á hæðinni eru einnig tvö svefnherbergi og eitt baðherbergi sem rúma allt að fimm næturgesti hverju sinni.
Um miðjan júní kostar nóttin í sumarbústaðnum 431 bandaríkjadali, eða sem nemur tæplega 60 þúsund krónum á gengi dagsins í dag. Gestir þurfa að bóka að minnsta kosti tvær nætur í húsinu, en tvær nætur auk þjónustugjalds Airbnb kosta því 1.012 bandaríkjadali, eða rúmlega 140 þúsund krónur.