Landsliðsmarkvörður Dana í handbolta, Niklas Landin, er meiddur á auga og óvíst er með framhaldið hjá honum. Félagslið hans, Aalborg, hefur upplýst að Landin spili ekki í undanúrslitum dönsku deildarinnar gegn Skjern á fimmtudaginn.
Landin sneri heim úr landsliðsverkefni Dana og missti af báðum landsleikjum helgarinnar gegn Noregi og Króatíu. Greiningin er blæðing á nethimnu í hægra auga markvarðarins sem kom fram í læknisskoðun í dag. Meiðslin hlaut hann í leik gegn Bjerringbro-Silkeborg þann 5. maí.
Aalborg mætir Skjern á fimmtudaginn í undanúrslitum en liðið er einnig komið í undanúrslit í Meistaradeild Evrópu.