„Þessi bíll var nú bara ýmist á hjólunum eða hliðinni í nótt, hann fauk sitt á hvað,“ segir Sigurgeir Brynjar Kristgeirsson, betur þekktur sem Binni í Vinnslustöðinni, í samtali við mbl.is, um sendibíl sem fauk á vegg á Hlíðavegi í Vestmannaeyjum aftakaveðrinu í nótt.

Sigurgeir Brynjar Kristgeirsson, Binni, framkvæmdastjóri Vinnslustöðvarinnar í Vestmannaeyjum, segir veðrið í nótt eitt það versta sem hann hefur upplifað í Eyjum. Ljósmynd/Óskar Pétur Friðriksson.

„Versta verður sem ég hef upplifað í Eyjum“

„Svo eru gámar út um allt og tjaldið í spaði. Þetta er versta veður sem ég hef upplifað í Eyjum,“ segir hann. Veðrið var samt sem áður mjög misskipt í bænum að sögn Binna, en logn var heima hjá honum þegar Björgunarfélag Vestmannaeyja fór í sín fyrstu útköll síðdegis í gær. „En svo bara trylltist allt skömmu síðar. Þetta voru bara hvellir, þetta var ekki stöðugur vindur.“ Björgunarfélagið hefur alls sinnt yfir 100 útköllum síðasta rúma hálfa sólarhringinn.

Frétt af mbl.is

Mikið foktjón á hafnarsvæðinu í Eyjum

Mikið tjón varð á hafnarsvæðinu og fauk salttjald í eigu Vinnslustöðvarinnar. „Það fór bara til fjandans. Við undirbjuggum okkur en bjuggumst ekki við svona ofsaveðri. Við vorum búin að gera allt klárt eins og við erum vön en á hafnarsvæðinu var þetta miklu verra veður en við höfum upplifað áður,“ segir Binni. 

Salttjald í eigu Vinnslustöðvarinnar í Vestmannaeyjum fauk af í heilu lagi. Ljósmynd/Sigurgeir Brynjar

Veðrið er að ganga niður og spár gera ráð fyrir að það lægi um hádegi.

Veðurvefur mbl.is

Tengdar fréttir

Ofsaveður í desember 2019

Færanlegar rafstöðvar efla fjarskiptaöryggi

• Áskoranir og viðbrögð vegna óveðursins
• Varaafl bætt á 68 fjarskiptastöðum
• Strengurinn bætir ástandið mikið eftir óveðrið
• Stór áfangi að ólík ráðuneyti geti unnið saman

» Fleiri tengdar fréttir

• Blogga um frétt