Harry prins og Meghan Markle slá ekki slöku við eftir brúðkaup sitt í gær heldur munu þegar í stað hefja störf sín fyrir konungsfjölskylduna. Nú sem hertoginn og hertogaynjan af Sussex. Þau ætla því að slá brúðkaupsferðinni á frest um hríð.

Meghan og Harry gengu í hjónaband í kapellu heilags Georgs í Windsor-kastala í gær. Um 100 þúsund manns höfðu safnast saman á götum úti til að sjá þegar þau fóru um í hestvagni að athöfninni lokinni. 600 ástvinum var boðið til athafnarinnar og um 200 til veislu um kvöldið

Hjónin brostu breitt er þau stigu upp í gamlan Jaguar á leið sinni til veislunnar í gærkvöldi en til hennar bauð Karl Bretaprins, faðir Harrys. Í veislunni var það leikarinn vinsæli Idris Elba sem m.a. tók að sér hlutverk plötusnúðs. 

Meghan og Harry skiptu í þægilegri klæðnað áður en þau fóru til veislunnar. AFP

George og Amal Clooney og Serena Williams voru á gestalistanum fyrir veisluna sem fór fram í húsi á lóð Windsor-kastala. 

Meghan klæddist brúðarkjól frá Givenchy-tískuhúsinu en fyrir veisluna skipti hún yfir í annan kjól sem var hannaður af Stellu McCartney. Á fingri hafði hún þá hring sem var í eigu Díönu heitinnar, móður Harrys.

Hjónin ætla ekki að fara strax í brúðkaupsferð. Strax á þriðjudag munu þau hefja störf samkvæmt konunglegum skyldum sínum og verða viðstödd garðveislu sem haldin er til góðgerðarmála í Buckingham-höll.

Meghan og Karl tengdafaðir hennar eru sögð hafa myndað sterk tengsl og það var hann sem fylgdi henni inn kirkjugólfið í gær þar sem faðir hennar var fjarri góðu gamni vegna veikinda.

Hertoginn og hertogaynjan af Sussex óku á gömlum Jaguar til veislunnar. AFP

Tengdar fréttir

Kóngafólk í fjölmiðlum

Þráir að hitta barnabörnin sín

• Nýgift og eiga von á barni
• Karl opnar Balmoral-kastala og seldist upp strax
• Hvernig á að tala við börn um veikindi
• Kápa Meghan kostaði yfir hálfa milljón

» Fleiri tengdar fréttir

• Blogga um frétt