Segir ferilinn vera búinn

Englendingurinn Phillip Schofield segist hafa „tapað öllu” og telur sig ekki eiga framtíð sem sjónvarpsmaður. 

Schofield hætti hjá sjónvarpsstöðinni ITV eftir að upp komst að hann hefði átt í ástarsambandi við ungan karlkyns samstarfsmann og logið til um það. 

Í sjónvarpsviðtali við BBC sagði Schofield feril sinn vera búinn. Hann tók fram að hann og samstarfsmaðurinn væru „ekki kærustupar” og að þeir hefðu aðeins átt fimm eða sex ástarfundi á nokkurra mánaða tímabili.

Engu að síður sagði hann ástarsambandið hafa verið „alvarleg mistök” og bætti við: „Ég hefði ekki átt að gera þetta”.

Spurningar hafa vaknað um hvort yfirmenn ITV hafi vitað af sambandinu og hvort rannsókn sjónvarpsstöðvarinnar á málinu hafi gengið nógu langt.

„Ég verð að tala um sjónvarp í þátíð, sem mér finnst mjög sorglegt. Ég hef tapað öllu.”

Schofield var enn kvæntur Stephanie Lowe þegar hann átti í ástarsambandinu. Þau skildu árið 2020 eftir að hann kom út úr skápnum.

• Blogga um frétt