Bleiksárbrúin laskaðist

Menn úr vinnuflokkum Vegagerðarinnar hefjast strax eftir helgi handa við að reisa nýja brú yfir Bleiksá innarlega í Fljótshlíð.

Burðarstaur við nyrðri enda gamallar brúar sem nú er yfir ána gaf sig á miðvikudaginn svo loka varð fyrir umferð stærri bíla og loks allra ökutækja. Í gær voru í ána sett ræsi og þar mótaður vegur yfir. Sú lausn er þó aðeins til skemmri tíma.

Brúin gamla er átta metra löng, reist fyrir um sextíu árum og er barn síns tíma eins og gjarnan er sagt, að því er fram kemur í Morgunblaðinu í dag.