Harry og Meghan hafa haldið til í Kanada síðan fyrir áramót í lúxusvillu sem þau eru með tímabundið í láni frá ónafngreindum aðila. Þau munu láta formlega af störfum sínum fyrir bresku krúnuna 31. mars. Eins og sjá má af myndum AFP af húsinu og svæðinu í kring ætti ekki að væsa um þriggja manna fjölskylduna í Kanada. 

Húsið er staðsett í Norður-Saanich á suðurhluta Vancouver-eyju. Eins og nafnið gefur til kynna er eyjan nálægt borginni Vancouver. Húsið sem Harry og Meghan hafa dvalið í er í hverfi sem heitir Deep Cove. Mikil náttúrufegurð umlykur húsið og hafa nágrannar þeirra tekið eftir hjónunum í göngutúrum og á matarmarkaði. 

Umhverfið er skógi vaxið og sést ekki inn um hliðið að húsinu. Frá sjónum sést hins vegar húsið vel en útsýni er yfir hafið og strönd í nágrenninu eins og sést á meðfylgjandi myndum.