Munurinn geysilegur á milli mynda

Það eru ekki allar myndir gjaldgengar á samfélagsmiðlum, eða þannig líta margir á að minnsta kosti. Unglingar sem fengu það verkefni að breyta myndum af sér þannig að þær væru tilbúnar til birtingar á samfélagsmiðlum breyttu myndunum ótrúlega mikið. 

Breski ljósmyndarinn Rankin vann myndaþátt undir nafninu Selfie Harm þar sem hann bað unglinga um að breyta myndum. Unglingarnir höfðu fimm mínútur til þess að vinna myndirnar í smáforritum og er munurinn á fyrir- og eftirmyndinni mjög mikill. 

Fram kemur í máli ljósmyndarans á vef Health að þrátt fyrir að unglingunum þætti upprunalega myndin af sér betri en breytta útgáfan valdi enginn að birta myndina óbreytta. 

Hér má sjá myndir úr verkefninu sem birtar voru á Instagram en eins og sjá má breyttu unglingar myndunum af sér töluvert. 

• Blogga um frétt