Úthafskarfaveiðarnar hefjast á morgun

Úthafskarfaveiðar íslenskra skipa mega hefjast á morgun samkvæmt reglugerð, en fyrr í dag var enginn íslenskur togari kominn á veiðisvæðið úti við 200 mílna lögsögumörkin á Reykjaneshryggnum.

Fram kemur á vef HB Granda að úthafskarfakvótinn hafi verið skorinn hraustlega niður undanfarin ár. Nú sé svo komið að aðeins einn togari útgerðarinnar, Þerney RE, muni stunda veiðarnar nú í byrjun sumars.

Þerney er nú í höfn í Reykjavík en áhöfnin var að ljúka veiðiferð í norsku lögsöguna í Barentshafi með veiðum í lokin á Íslandsmiðum út af Suðausturlandi.

Haft er eftir Ægi Franzsyni skipstjóra að allt hafi gengið að óskum.

„Veiðitímabilinu á norska vertíðarsvæðinu við Lófót var lokið og við þurftum því að sækja þorskinn norður á Nordkap-veiðisvæðið og þar norður af. Aflabrögðin voru góð og þorskurinn vænn og við vorum með rúmlega 700 tonn upp úr sjó eftir um þrjár vikur á veiðum,“ segir Ægir.

„Yfirleitt eru maí og júní góðir í rússnesku landhelginni og þar er t.a.m. fínasta veiði núna. Það verður þó einhver bið á því að farið verði eftir rússneska kvótanum,“ segir Ægir.

• Blogga um frétt